08:02 10 августа 2016 г.
Тушкилти библиотекăра, пирěн ентеш çыравçăсене Ольга Владимировна Савандеевăна тата Валерий Васильевич Шарапова аса илсе, вěсене хисеплесе творчествăлла каçа ирттерме пуçтарăнтăмăр. Тушкилти культура çуртěнчи «Сурпан» фольклор ушкăнě халăх юррисене шăрантарчě. Çак тěл пулăва пěлěшěсем, тăванěсем тата шкул ачисем килчěç.
Нумай пулмасть, июль уйăхěнче, сăвăç, ача-пăча литературин пултаруллă çыравçи Ольга Владимировна Савандеева (1921-1982) çуралнăранпа 95 çул çитрě. Унăн «Пысăк чěпě» (1972), «Учитель парни» (1975), «Тěпсěр кÿлě» (1979) кěнекесем тухнă.
Августăн 8-мěшěнче, Валерий Васильевич Шарапов (1946-1978), пурăннă пулсан, 70 çулхи юбилейне паллă тунă пулěччě. В.В. Шараповăн «Уйăх çаплах çутатать» (1972), «Пурнăçа юратсан» (1978) ятлă кěнекесем пичетленсе тухнă. Ентешсене халалласа «Ячěсене манăçа хăварас марччě» ятлă кěнекесен куравě йěркеленě, альбом туса хатěрленě. Камасева Н.Н. библиотекарь кěскен çыравçăсен биографийěпе паллаштарчě.
Пултаруллă ентешсене аса илекенсем нумайăн пулчěç, Вăрмар районěнчен те килчěç: Анатолий Иванович Иванов - çыравçă, таврапěлÿçě. Елена Германовна Соборова - çыравçă., аслă категориллě медицина сестри. Владимир Иванович Шепеев - технологи учителě. Геннадий Германович Матвеев - çыравă, биологипе хими учителě, Шарапова халалласа, «Уйăх çаплах çутатать» ятлă сăвă çырнă. Ăна халăх умěнче вуласа пачě, тата хăйěн кěнекисене библиотекăна парнелесе хăварчě.
Уйрăмах каласа хăварас килет Галина Германовна Матвеева çинчен. Вăл РФ журналистчесен союзěн членě, çыравçă. Вăрмар районěнче пурăнать. Галина Германовна ентешсем çинчен Ял ěçченě хаçатра статьясем пичетлесех тăчě. Шарапов Валерий Васильевич çуралнăранпа 70 çул тултарнă тěле унăн кěнекисене 50 экземплярпа çěнетсе кăларчě, библиотекăна парнелесе хăварчě.
Фаддей Данилович Петров Раççей Журналисчěсен Союзěн членě, Савндеевăпа район конференцисенче пěрле хутшăнни çинчен каласа пачě.
Ольга Савандеева кун-çулěпе тěплěнрех унпа пěртăван Надежда Владимирăвнан хěрě, Ольга Николаевна Павлова паллаштарчě.
МБУК "Централизованная библиотечная система" Янтиковского района