13:41 22 марта 2017 г.
Василий Петрович Воробьев 1887 çулхи мартăн 19-мĕшĕнче Тăвай районĕнчи Эльпуç ялĕнче чухăн хресчен çемйинче çуралнă. Ялти шкултан вĕренсе тухсан Шăхасанти учительсем хатĕрлекен икĕ класлă шкула вĕренме кĕрет. 1913-1914 çулсенче Петербургра регент-учительсен курсĕнче вĕренет. Вĕренсе тухнă хыççăн çине тăрсах юрăсем çырас, вĕсене илемлетес енĕпе ĕçлет, пĕр вăхăтрах хор дирижерĕн ĕçне те пăрахмасть. 1917 çулта майăн 1-мĕшĕнче юрлама 150 çынран тăракан хор йĕркелет. Репертуара Ф. Павлов, В. Воробьев тата ытти композиторсем çырнă е илемлетнĕ чăваш юррисене кĕртеççĕ. 1924 çулта вăл Чăваш патшалăх хорĕята тивĕçет. 1934 çултан пуçласа вăл яланхи хор пулса тăрать. Çапла вара В. Воробьевпа Ф. Павлов Чăваш патшалăх хорне никĕслекенсем шутланаççĕ. В. Воробьев II сыпăклă шкулпа музыка шкулĕнче вĕрентекен, Чăваш патшалăх хорĕн илемлĕх ертÿçипе дирижерĕ, педагогикăпа музыка тата театр училищисенче юрлама вĕрентекен, хорпа юрлама вĕренекен класс ертÿçи. Вăл халăх юррисене пуçтарассипе нумай ĕçленĕ, пурĕ 800 яхăн чăваш юрри çырса илнĕ. Вĕсене тишкерсе, илемлетсе çĕнĕ юрăсем хайланă.Чăваш тăрăхĕнчи ĕç çыннисен хушшинче анлă сарăлнă çав юрăсем, нумайăшĕ чăннипех халăх юрри пулса тăнă.
В. П. Воробьева халалласа Эльпуçĕнчи библиотекăра «Мухтанатпăр ентешпе» литература каçĕ йĕркеленĕ. Композитор творчествипе Н.Н. Игнатьева паллаштарнă. Э. В. Филиппова 2006 çулта «Чăвашсен чаплă çыннисем» ярăмпа пичетленсе тухнă «Композиторы Воробьевы» кĕнекене тĕплĕн тишкерсе тухрĕ. Чăваш культурипе искусствишĕн ку кĕнеке чаплă тĕпчев ĕçĕ. Çавăн пекех, пухăннисене библиотекарь кĕнеке куравĕпе те паллаштарчĕ. Чăвашсен классикăлла музыка фондне кĕне «Кай, кай Ивана», «Килмен те курман Шупашкарне» юррисене пурте пĕрле юрланă. Библиотекăра «Пирĕн ентеш – паллă композитор» стенд та хатĕрленĕ.
Василий Петрович музыка искусствине чунтан парăннă, юрра-кĕвве тарăннăн ăнланакан, классикăлла произведенисем патне туртăнакан çын пулнă. Хорта юрлакансем ăна пысăк çынлăхпа ырă кăмăлĕшĕн юратнă.
МБУК "Централизованная библиотечная система" Янтиковского района