08:22 09 августа 2017 г.
Валерий Васильевич Шарапов 1946 çулхи августăн 8-мěшěнче Тушкил ялěнче çуралнă. Вăтам шкултан вěренсе тухсан хěрÿ чěреллě çамрăка хăрушă чир утайми туса хурать. Çук, хěн терте парăнмасть каччă. Аллине ручка тытать. Республикăри хаçат корреспонденчěсен ретне тăрать. Ял ěçченěсен пурнăçě çинчен очерксемпе калавсем çырма тытăнать. «Чир манăн çунатăмсене хуçрě. Пěрле вěреннě юлташсенчен юлма питě йывăр. Анчах пуçа усма юрамасть. «Чăтма çук йывăрлăхра пурăнма пěл», - тенě Н. Островский. Эпě те çаплах шутлатăп…» - çырать вунтăххăрти çамрăк хăйěн пěр статйинче. В.В. Шараповăн «Уйăх çаплах çутатать» (1972), «Пурнăçа юратсан» (1978) ятлă кěнекесем пичетленсе тухнă. В. Шарапов 1978 çулта вилнě.
Нумай пулмасть, утă уйăхěнче, Ольга Владимировна Савандееван та çуралнă кунě пулчě.Ольга Владимировна Савандеева Турикас Тушкилте 1921 çулта çуралнă. Тушкилти çичě çул вěренмелли шкулта 4 çул вěренсен йывăр чирлесе ÿкет, виçě çул шкула çÿреймест.
Каярахпа вăл 5-мěш класра вěренме тытăннă. Тăван чěлхепе вěсене Тăрмăш çынни Николай Яковлевич вěрентнě. Чăваш чěлхипе литературине юратаканскер, вăл ачасене те тăван чěлхене юратма хăнăхтарса пынă. Николай Яковлевич хавхалантарнипе Ольга та 7-мăш классрах сăвăсем çырма пуçланă.
Хăй çырнă произведенисене уйрăм кěнекесемпе пичетлесе кăларать. Унăн «Пысăк чěпě» (1972), «Учитель парни» (1975), «Тěпсěр кÿлě» (1979) кěнекесем тухнă.
Иккěмěш ушкăнри инвалид пулнăскерěн сывлăхě хавшасах пынă. Ольга Савандеева 1982 çулхи декабрěн 18-мěшěнче вилнě.
Тушкилти библиотекăра ентеш çыравçăсене халлласа литература сехечě ирттернě. «Ячěсене манăçа хăварас марччě» ятлă кěнекесен куравě йěркеленě, альбомсем туса хатěрленě.
МБУК "Централизованная библиотечная система" Янтиковского района