07:55 10 августа 2017 г.
Çак кунсенче Тушкилти библиотекăна Геннадий Германович Матвеев килсе кайрě. Вăл «Хěвел тухать вăрман енчен» ятлă кěнекине библиотекăна парнелесе хăварчě.
Геннадий Германович Матвеев Вăрмар районěнчи Тикаш ялěнче çуралнă. Ашшě, Герман Матвеевич Матвеев – пултаруллă журналист, нумай çул хушши Вăрмарпа Тăвай район хаçачěсен тěп редакторě пулса ěçленě. Амăшě, Анна Андреевна Матвеева, Тикаш шкулěнче хěрěх çул ытла учитель пулса тăрăшнă.
Шкул хыççăн Геннадий Германович Ялхуçалăх институтне, кайран Чăваш педагогика институтне пěтерсе икě диплом илет. Малтан Пысăк Енкасси хуçалăхěнче, каярахпа 27 çул Тăвай районěнчи Кармалта биологипе химии учителě пулса ěçлет. Хальхи вăхăтра вăл Вăрмар районěнчи Урнар шкулěнче вěрентет.
Геннадий Германович вěреннě, ěçленě вăхăтра сăвăсемпе интересленет. 2011-мěш çулта Шупашкарти «Çěнě Вăхăт» типографинче унăн «Юхать Кěтне», 2013-мěш çулта «Çăлтăрлă çумăр», 2014-мěш çулта «Каçхи шурăмпуç çути», 2015- мěш çулта «Çулсем чěнеç тăван яла», «Салют Победы», 2016-мěш çулта «Посреди мечты» кěнекисем пичетленсе тухнă. Геннадий Германович пистельсен Союзěн членě, 2013-мěш çулхи Чăваш республикин Алексей Талвир ячěллě литература преми лауреачě.
МБУК "Централизованная библиотечная система" Янтиковского района