11:26 04 сентября 2019 г.
Илле Тăхти (Илья Ефимович Ефимов) 1889 çулхи авăн уйăхĕн 4-мĕшĕнче Чăваш Республикин Тăвай районĕнчи Нӳшкассинче чухăн хресчен кил- йышĕнче çуралнă. Малтан Эльпуçĕнчи прихут шкулне çӳрет, унтан тăван ялти пуçламăш шкулта вĕренет, Сĕвери прихут шкулне куçать. 1903 çулта Хусанти учительсем хатĕрлекен семинарие
вĕренме кĕрет. 1908-1914 вăл Тавăтри пуçламăш шкул (Чăваш Республикин Элĕк районĕ) учителĕ. Ун хыççăн Вятка кĕпĕрнине куçса каять, çулталăкран ăна пĕрремĕш тĕнче вăрçине илеççĕ. Октябрьти революци хыççăн Тăхти каллех халăха вĕрентес ĕçе кӳлĕнет: Шăхранти (халĕ Канаш) кăтартуллă шкулта, Çутĕç комиссариачĕн инспекторĕнче, Шупашкарти педтехникумра ĕçлет, чăваш чĕлхипе
литературине вĕрентет. 1938 çулхи нарăсăн 22-мĕшĕнче Шупашкарта ӳпке чирĕпе вилнĕ.
Литература ĕçне 1905 çулта тытăннă. 1906-1907 çулсенче семинарире тухса тăнă «Шурăмпуç» ятлă ал çыру журналне хутшăннă, уйрăмах йăла- йĕрке ӳкерчĕкĕсем çырнă, фольклор пухнă. 1908 çулта арифметика задачникĕ пичетлесе кăларнă, «Вутăшпа чăваш» юмах çырнă. 1911 çулта унăн «Хураç» калавĕ Хусанта «Пуян пулас килсен, ак кĕнекене ил» ятпа тухать. Çак çулах «Тавăт, Мĕлĕш, Шураç юррисем» кĕнеке кăларать. 1914-1915 çулсенче Сарапулта вырăсла тухса тăнă «Кама» хаçатра фельетонсем пичетлет. Совет саманинче сăмах ăсти «Элихун», «Колчак» тата «Самана сăвви» поэмăсем,
калавсемпе повеçсем калăпланă. Вăл çырнисем: «Суйласа илнисем» (1960), «Поэзи, проза, публицистика» (1979) кĕнекесенче пичетленнĕ.
Эльпуçĕнчи библиотекăра Илле Тăхти çуралнăранпа 130 çул çитнĕ май кĕнеке куравĕ йĕркеленĕ. Куравра И. Тăхтин кĕнекисемпе «Суйласа илнисем» (2009), «Поэзи, проза, публицистика» (1979), альбомпа, фотосемпе, хаçатри статьясемпе паллашма пулать.
МБУК "Централизованная библиотечная система" Янтиковского района